«Әділдік және Өркендеу» қоғамдық қоры

Президент Қасым-Жомарт Тоқаевтың Әділетті Қазақстанды құруға бағытталған саяси реформалары қазақстандықтардың басым көпшілігінің қолдауына ие болды. Азаматтар бұл реформалардың әділдік, ұлттық байлықтың тең бөлінуі, білім мен медицинаның жаңа сапасы, еңбек адамының құқығын қорғау секілді қағидаттарын қолдайды. Алайда, орталықта айтылған реформалар діттеген жеріне жете бермейді. Азаматтар әлі де аз жалақы алып, қомақты салық төлеп жүр, мегаполистерде, шалғай ауылдар да бай мен кедей арасындағы алшақтық ушығып барады. Бұл әділетсіздік және біз жағдайды өзгерткіміз келеді.

Қоғамдық Қор елдің барлық өңірінен жиналған белсенді азаматтардың бастамасымен құрылды. Біздің арамызда - өнеркәсіп кәсіпорындарының жұмыскерлері, фермерлер, кеншілер, құтқарушылар, дәрігерлер, мұғалімдер мен журналистер, түрлі ҮЕҰ өкілдері бар. Біз өз күшімізді, жинаған тәжірибеміз бен мүмкіндіктерімізді әрбір отандасымыздың Әділетті Қазақстанды шынайы сезінуіне жұмсағымыз келеді.

Күн сайын барлық деңгейдегі билік органдарына азаматтардан сан сауал мен өтініштер келіп түседі. Бір азамат жұмыста әділетсіздікке тап болса, енді бірі тұрғын-үй коммуналдық тарифтерінің қымбаттағанына наразы. Кей азаматтар шахтадағы қауіпсіздік ережелерінің бұзылуына, енді бірі жастар арасындағы нашақорлыққа алаңдайды. Бір өңір таза ауыз су проблемасын тартып отыр, енді бір аймақта түзу жол жоқ. Мұндай өтініштердің ағыны – ел дамуының құнды ресурсы. Демек, біздің азаматтар немқұрайлы емес, мәселені ашық айта отырып шешімін ұсынады. Әркімнің үні естілуі керек.

Осы уақытқа дейін «халық үніне құлақ асатын мемлекет» жүйесі «жоғарыдан» құрылды. Ал, біздің идеямыздың өзегі - еститін мемлекетті халықтың өз арасынан бастау. Қоғамдық күштер бірігіп, белсенділік танытқанда проблемалар тез әрі тиімді шешіледі. Сөз, әлеуметтік демократия жөнінде болып отыр. Яғни, әлеуметтік мәселелердің шешімін мемлекеттік орган мен азаматтық қоғам бірлесіп тапса керек. Біз үшін өзекті мәселелерді шешуде билікпен конструктивті диалог аса маңызды.

Әділеттілік – нақты ұғым. Біз үшін әділдік – еңбек адамының қоғамдағы лайықты орны. Жұмыскер мен қызметшінің, дәрігер мен мұғалімнің, фермерлердің құқығын қорғау, қоғамдық бақылау жүйесі арқылы әлеуметтік игіліктер алуға тең мүмкіндік жасау, еңбек адамы мен жұмыс берушінің арасында диалог орнату. Міне, біздің міндетіміз осы. Байлар салықты молырақ төлеуі керек, жемқорлықпен, заңсыз жолмен дүние жинауға жол жоқ, әлеуметтік игіліктерге қол жеткізу адамның қоғамдық мәртебесіне немесе тұрғылықты аймағына байланысты болмауы керек.